ஏன் தொலைகிறது
அந்நியத்தோடு செர்ந்து
ஆர்வமும்?
கனி இதழும்
கசக்கிறது அவள்
பேசத் துவங்கியதும்!
பேசியும் கொல்கின்றன
பேசாமலும் கொல்கின்றன - அன்று
பேசவைத்த இதழ்கள்!
கருவண்டு விழிகள்
கலங்க வைக்கின்றன இன்று
கேள்விகளோடு நோக்கையில்!
வானவில் புருவங்கள்
வயிற்றைக் கலக்குகின்றன
அவள் மௌனத்தில் உயர்ந்து!
செல்லமான அடிகள்
சீறிப் பாய்கின்றன
இன்று!
கொலுசிற்கும் வளையலுக்குமான சண்டையில்
கொலையுண்டு கிடக்கிறது
குற்றமற்ற என் பேனா!
காதலைத்
துரத்திவிட்டதா
காலத்தின் மாற்றம்?
அவளைப் பற்றி எழுதும்
அவளுக்கான கவிதையை
அவளே கெடுக்கிறாள்!
எல்லா தவறுகளும்
என் பொறுப்பிலேயே
ஏன் வந்து சேர்கின்றன?
கடவுளே... இந்தக்
கவிதைகளை என்
காதலி படித்துவிடக் கூடாது!
இதுதான் காதல் என்றாலும்
இன்னும் ஆயிரம் ஆண்டு
இதில் இன்பமாய் வாழ்வேன்...
