மார்கழி வெண்பா - 7 - இரதபந்தம்

#மார்கழி 7

சுவைமேவு கற்பார்க்கச் சோதி அணித்தாம்
நிலைமேவ மாற்று நிறைபாக் - கிறையார்வத்
தாசிசேர்த்தீர் சேர்ந்திலங்கு தஞ்சருளும் யோகமார்ச்சர்
வாசகஞ்சேர் மாணிக்க மே!

(நேரிசை வெண்பா; தேர்க்கட்டு / இரதபந்தம்; இரட்டுறமொழிதலுமாம்.)

கற்பவர்க்கு இனிய சுவை தருவதாயும் (சுவைமேவு),
அந்தச் சோதியாகிய இறைவனின் அருகில் இருக்கும் (அணித்தாம் - அணித்து+ஆகும்) நிலை பொருந்தவும் (நிலைமேவு) செய்யும் (மாற்று - நிலையை மாற்று)
நிறைவான பாக்களுக்கு (நிறை பாக்கு)
இறைவனே ஆர்வத்தால் ஆசி சேர்க்கும் தன்மையீர் (இறை ஆர்வத்து ஆசி சேர்த்தீர்);
உய்வை அருளும் (தஞ்சருளும்) இணையாக விளங்கும் (சேர்ந்திலங்கு) (திருவடிகளை உடைய)
யோகிகளான (யோகம்) பூசைக்குரியவரே (ஆர்ச்சர் - ‘அர்ச்சனை’ என்பதிலிருந்து ஆர்ச்சர் என்று ஆனது, அர்ச்சனைக்குரியவர்)...

வாசகஞ்சேர் மாணிக்கமே:

1. திருவாசகம் சேர்த்த மாணிக்கவாசகரே
2. வாசு அகம் சேர் மாணிக்கமே (வாசுதேவனின் உளத்தில் நிறைந்த மாணிக்கம் போன்ற ஆண்டாளே!)

(இப்பா இரதபந்தமாவதைப் படத்தில் கண்டறிக! மாணிக்கவாசகர் - ஆண்டாள் இருவருக்குமே தனித்தனியே இப்பா பொருந்துவதால் இது இரட்டுறமொழிதலும் ஆயிற்று!)

இனிய காலை வணக்கம்...

நன்றி.

(C) 2019, Vennkotran.